ՀՀ արտաքին գործերու եւ միջազգային առեւտուրի նախարար Արարատ Միրզոյեան հանդիպում ունեցած է Իրանի արտաքին գործերու նախարար Ապպաս Արաղչիի հետ։
Զրուցակիցները հանգամանօրէն քննարկած են Հայաստանի եւ Իրանի միջեւ յարաբերութիւններու զարգացման բոլոր հարցերը: Երկուստեք ընդգծուած է յարաբերութիւններու ռազմավարական բնոյթը, որ արտացոլուած է ՀՀ Կառավարութեան 2026-2031թթ. ծրագրին մէջ եւ իր գործնական արտայայտութիւնը կը գտնէ թէ՛ բարձրագոյն մակարդակով երկխօսութեան շարժընթացին, թէ՛ կարեւոր ծրագրերու իրագործման մէջ:
Արարատ Միրզոյեան եւ Ապպաս Արաղչի քննարկած են շարք մը բնագաւառներու մէջ համագործակցութեան ծրագրերը, այդ շարքին՝ ուժանիւթի, փոխադրութեան եւ ենթակառուցուածքներու զարգացման ոլորտներուն մէջ: Անդրադարձ կատարուած է Հայաստան-Իրան սահմանին երկրորդ կամուրջի կառուցման, ելեկտրահաղորդման 3-րդ գիծի շինարարութեան շուտափոյթ աւարտման կարեւորութեան, ինչպէս նաեւ երկու երկիրներուն միջեւ առկայ բեռնափոխադրումներու դիւրացման հարցերուն:
Հայաստանի եւ Իրանի նախարարները միտքեր փոխանակած են ապաշրջափակման բերումով ստեղծուող առաւելութիւններու եւ տարածաշրջանային փոխկապակցուածութեան ծրագրերու շուրջ: Ընդգծուած է Իրանի աջակցութիւնը «Խաղաղութեան խաչմերուկ» ծրագրին: Նախարար Միրզոյեան ներկայացուցած է TRIPP նախագիծի իրականացման ուղղութեամբ տարուող աշխատանքները եւ անոր միջոցով տարածաշրջանային երկիրներուն ընձեռնուող նոր հնարաւորութիւնները:
Անդրադարձ կատարուած է հանրային տեղեկատուութեան ոլորտին մէջ շարունակական փոխգործակցութեան կարեւորութեան, այդ շարքին՝ լրատուական տիրոյթին մէջ անհարկի շահարկումներուն պատշաճ հակազդեցութեան առումով:
Նախարարները միտքեր փոխանակած են տարածաշրջանային զարգացումներու շուրջ։ Այս առումով, նախարար Միրզոյեան ընդգծած է, որ Հայաստան ուշադրութեամբ կը հետեւի ընթացիկ իրավիճակին՝ կարեւորելով բանակցային ճամբով առկայ խնդիրներու կարգաւորման ուղղուած ճիգերը:
Անդրադարձ կատարուած է փոխադարձ հետաքրքրութիւն ներկայացնող այլ հարցերու:
