Լիբանանի նախագահ Ժոզէֆ Աուն հեռաձայնային զրոյց ունեցած է ԱՄՆ պետական քարտուղար Մարքօ Ռուպիոյի հետ, որուն ընթացքին քննարկուած է Լիբանանի եւ շրջանին մէջ տիրող ընդհանուր իրավիճակը վերջին զարգացումներու լոյսին տակ։
Հեռաձայնային զրոյցին ընթացքին անդրադարձ կատարուած է նաեւ Լիբանանի հարաւին մէջ տիրող իրավիճակին՝ նկատի ունենալով Իսրայէլի կողմէ այդ շրջանին մէջ գիւղերու եւ քաղաքներու վրայ շարունակուող յարձակումները։
Նախագահ Աուն խնդրած է ճնշում բանեցնել Իսրայէլի վրայ՝ դադրեցնելու համար այդ յարձակումները, հետեւելու շրջանակային համաձայնագրի պայմաններուն, դադրեցնելու համար քանդումի գործողութիւնները եւ թոյլ տալու համար գիւղացիներուն մուտք գործել իրենց դաշտերը՝ առանց յարձակումներու ենթարկուելու:
Նախագահ Աուն վստահեցուցած է, որ բանակը եւ անվտանգութեան ուժերը լիովին կը կատարեն իրենց պարտականութիւնները՝ զէնքի եւ զինամթերքի բռնագրաւման, ինչպէս նաեւ մաքսանենգութեան դէմ պայքարի վերաբերեալ որոշումներու կատարման գործին մէջ։ Ան աւելցուցած է, որ դատական մարմինները կը հետեւին իրենց յղուած բոլոր գործերուն, եւ որ մեղաւորներուն նկատմամբ մեղմ վերաբերմունք պիտի չըլլայ. օրէնքը պիտի կիրարկուի առանց որեւէ կողմնակալութեան։
Ռուպիօ հեռաձայնային զրոյցին ընթացքին կոչ ըրած է լիբանանեան եւ իսրայէլեան ուժերու միջեւ ուղիղ ռազմական կապ հաստատելու՝ «հակամարտութեան դադրեցման համար»։ Պետական քարտուղար Ռուպիօ անդրադարձած է «Հըզպալլա»-էն հարիւրաւոր քիլոկրամ պայթուցիկ նիւթերու բռնագրաւման հարցին։
Ան Աունին կոչ ըրած էպատասխանատուութեան ենթարկելու անոնք, որոնք հրամայած, ֆինանսաւորած եւ ուղղորդած են այդ բեռին փոխադրութիւնը, ինչպէս նաեւ «ընդգծած է, որ պայթուցիկ նիւթերը «Հըզպալլա»-ին վերադարձնելը բացարձակապէս անթոյլատրելի է»։
Յիշեցնենք, որ «Հըզպալլա»-ի անդամներէն մէկը աւելի վաղ յայտնած էր, որ անցեալ շաբաթ լիբանանեան անվտանգութեան ուժերուն կողմէ բռնագրաւուած պայթուցիկ նիւթերը կը պատկանէին խմբաւորումին։
