««Amazon»-ը պատրաստ է Հայաստանի մէջ ներդրումներ կատարելու, եթէ ապահովուի ընկերութեան համար անհրաժեշտ շուրջօրեայ կայուն ելեկտրամատակարարումը»։
«Ինֆոքոմ»-ին տուած հարցազրոյցի ընթացքին այս մասին յայտնած է վարչապետ Նիկոլ Փաշինեան՝ յղում ընելով բարձր արհեստագիտական արդիւնաբերութեան նախարարէն ստացած նամակին։
«Amazon-ը պատրաստ է Հայաստանի մէջ ներդրումներ կատարելու, բայց իրեն 1000 մեկաուաթանոց կայան պէտք է։ Կ՚ըսէ՝ եթէ դուք ըսէք, որ 1000 մեկաուաթանոց կայան պիտի ըլլայ, ես Հայաստանի մէջ համապատասխան չափի ներդրումներ պիտի կատարեմ»,- ըսած է վարչապետը։
Ան չէ յստակացուցած հաւանական ներդրումներու չափը, նախագիծի բնոյթը կամ իրականացման ժամկէտները։
Փաշինեան մանրամասնած է, որ ընկերութեան շուրջօրեայ կայուն ելեկտրամատակարարում անհրաժեշտ է։ Այդ առումով ան խօսած է աթոմակայանի, ուժանիւթի կուտակիչներու եւ հողմային կայաններու անհրաժեշտութեան մասին։
Վարչապետին խօսքով՝ Հայաստանի մէջ արհեստական բանականութեան ոլորտին մէջ արդէն հաստատուած նախագիծերու եռանդային պահանջարկը կը գերազանցէ երկրին առկայ կարողութիւնները։ Ան նոր ներդրումային ծրագրերով բացատրած է աւելի մեծ հզօրութեամբ աթոմակայան կառուցելու նկատմամբ կառավարութեան աճող հետաքրքրութիւնը։
