Իսրայէլի վարչապետ Պենիամին Նեթանիահու յայտնեց, որ չի փափաքիր Թուրքիոյ հետ առճակատում, սակայն, իր խօսքով, Թուրքիան է, որ կը ձգտի անոր։ Նեթանիահուի պնդումով՝ Թուրքիոյ նախագահ Ռեճեպ Թայիպ Էրտողան կը յայտարարէ, թէ Իսրայէլ պէտք է ոչնչացուի, իսկ Երուսաղէմը կը պատկանի Թուրքիոյ։
Իսրայէլի վարչապետը նշեց, որ Էրտողան կը կարծէ, թէ կրնայ վերականգնել Օսմանեան կայսրութիւնը, սակայն, Նեթանիահուի խօսքով, կը մոռնայ, որ Իսրայէլը եւ հրեայ ժողովուրդը այս տարածքին հետ կը կապէ աւելի քան 3000 տարուան պատմութիւն։
«Մենք 16-րդ դարուն մէջ չենք, երբ օսմանցիները գրաւեցին այս տարածքը եւ 400 տարի իշխեցին հոս։ Հոս ոյժ կայ։ Ան հրէական պետութիւնն է՝ հրէական հողին վրայ»,- յայտնեց Նեթանիահու։
