ԱՄՆ Պետական քարտուղարութիւնը պաշտօնապէս յայտարարած է «Արդարութեան համար վարձատրութիւն» ծրագրի ծիրէն ներս մեծ գումար վճարելու պատրաստակամութեան մասին։ ԱՄՆ կը հետաքրքրուի Իրանի միջուկային ծրագրին հետ կապուած հաստատութիւններու, սարքաւորումներու եւ ներգրաւուած անձնակազմի, այդ կարգին՝ գիտնականներու մասին տեղեկութիւններով։ Հետախուզական ծառայութիւնները նաեւ կը հետաքրքրուին, թէ ուր կրնային տեղափոխուած ըլլալ սարքաւորումներն ու անձնակազմը ամերիկեան հարուածներէն ետք։
Տեղեկութիւնները հնարաւոր է փոխանցել Signal ծածկագրուած հաղորդագրութիւններու յաւելուածին կամ Պետական քարտուղարութեան ծրագրի անանուն առցանց հարթակին միջոցով։ Գումարէն բացի, անհրաժեշտութեան պարագային տեղեկութիւն տրամադրողներուն կը խոստանան աջակցիլ այլ երկիր տեղափոխուելու հարցին մէջ։
Պետական քարտուղարութեան մէջ նախաձեռնութիւնը կը պայմանաւորեն Իրանի միջուկային ծրագրի ներկայ վիճակին վերաբերեալ հաւաստի տեղեկութիւններու պակասով։ Ըստ գերատեսչութեան՝ Թեհրանի կողմէ Հիւլէական ուժանիւթի միջազգային գործակալութեան առջեւ ստանձնած պարտաւորութիւնները չկատարելուն հետեւանքով տեսուչները կորսնցուցած են առանցքային բաղադրիչները, այդ կարգին՝ կեդրոնախոյս մեքենաներու արտադրութիւնն ու պաշարները վերահսկելու հնարաւորութիւնը։
Պետական քարտուղարութեան տուեալներով՝ Իրանը ուրանը հարստացուցած է մինչեւ 60 տոկոս։ Միջուկային զէնք ստեղծելու համար անհրաժեշտ է մօտ 90 տոկոս հարստացման մակարդակ։ Փորձագէտներու գնահատումով՝ Իրանի ունեցած պաշարները հետագայ հարստացումէն ետք կրնան բաւարարել քանի մը միջուկային մարտագլխիկի համար։
