Քեպէքի վարչապետ Փօլ Սեն Փիեռ Փլամոնտօն Հայաստանը նշած է իբրեւ արտասահմանի մէջ Քեպէքի կառավարական նոր ներկայացուցչութիւն մը բանալու հաւանական վայրերէն մէկը՝ Քեպէքի միջազգային ներկայութիւնը ամրապնդելու լայնածաւալ նախաձեռնութեան մը ծիրին մէջ։
Քամպոտիայի մէջ կայացած Ֆրանքոֆոնիայի գագաթաժողովի ընթացքին Փլամոնտօն «The Canadian Press» լրատու գործակալութեան յայտնած է, որ իր կառավարութիւնը կը նախատեսէ կրկնապատկել Քեպէքի միջազգային ներկայացուցչութիւններուն ցանցը՝ անոնց թիւը 34-էն բարձրացնելով 68-ի։
Վարչապետը յատկապէս յիշատակած է Հայաստանը իբրեւ հաւանական վայր՝ ընդգծելով անոր «աշխարհագրական յատկապէս իւրայատուկ դիրքը»՝ Եւրոպայի, Ասիոյ եւ Կովկասի խաչմերուկին վրայ։
Ընտրարշաւի ընթացքին ան պաշտպանած էր Հայաստանի մէջ Քեպէքի պաշտօնական ներկայացուցչութիւն մը բանալու գաղափարը՝ նպատակ ունենալով ամրապնդել երկկողմանի յարաբերութիւնները եւ խթանել Քեպէքի ու Հայաստանի միջեւ համագործակցութեան ընդլայնումը։
Թէեւ Հայաստանի մէջ գրասենեակ մը բանալու վերաբերեալ տակաւին պաշտօնական որոշում չէ յայտարարուած, սակայն Հայաստանը քննարկուող երկիրներու շարքին ներառելը քաջալերական զարգացում մըն է՝ Քեպէքի եւ Հայաստանի միջեւ յարաբերութիւնները ամրապնդելու ուղղութեամբ շարունակուող ջանքերուն համար։