Իսրայէլի նախագահ Իցհակ Հերցոկ դատապարտած է Երուսաղէմի հայ համայնքին դէմ յարձակումները։
Այս մասին հաղորդագրութիւն տարածած է Երուսաղէմի Հայ դատի յանձնախումբը։
«Երուսաղէմի Հայ դատի կոմիտէն կ’ողջունէ Իսրայէլի նախագահ Իցհակ Հերցոկի արձագանգը մեր 7 Օգոստոս 2026-ի նամակին, որուն մէջ մենք խոր մտահոգութիւն յայտնած ենք հայ համայնքին դէմ յարձակումներուն վերաբերեալ եւ կոչ ըրած ենք ձեռնարկելու անհրաժեշտ եւ արդիւնաւէտ միջոցներու՝ համայնքի անդամներուն եւ անոնց հաստատութիւններուն պաշտպանութիւնը ապահովելու համար։
16 Սեպտեմբեր 2026-ի իր նամակին մէջ նախագահ Հերցոկ անդրադարձած է այս միջադէպերուն լրջութեան եւ յայտարարած է նման գործողութիւններու կրկնութիւնը կանխելու իր յանձնառութեան մասին։ Ան նաեւ վերահաստատած է հայ համայնքին կարեւորութիւնը, որ սերունդներ շարունակ Երուսաղէմի կեանքին արժէքաւոր մաս կազմած է։ Իր նամակի յատկապէս կարեւոր հատուածին մէջ նախագահը կը նշէ.
«Կը փափաքիմ ընդգծել, որ պիտի ընեմ ամէն ինչ իմ լիազօրութիւններուս սահմաններուն մէջ՝ օգտագործելով իմ տրամադրութեան տակ եղած բոլոր միջոցները՝ նման միջադէպերու կրկնութիւնը կանխելու համար»։ Ես համոզուած եմ, որ այս անհատները չեն ներկայացներ Իսրայէլի իրական դէմքը, եւ անոնց գործողութիւնները չեն արտացոլեր ո՛չ մեր արժէքները, ո՛չ ալ մեր նուիրուածութիւնը հայ համայնքին, որ հին եւ սիրուած համայնք է եւ սերունդներ շարունակ բարի եւ յարգուած դրացի եղած է Երուսաղէմի մէջ, որուն հետ Հին քաղաքի հրէական համայնքը սերտ կապեր ունի»։
